Так наблiжалася Перамога
На тэрыторыі нашага раёна дзейнічала падполле. Кіраўніком быў Ермалай Яфімавіч Гораў, ляснічы Юркевіцкага лясніцтва . Падпольшчыкі распаўсюджавалі газеты і лістоўкі, перадавалі звесткі аб дыслакацыі ворага, руху эшалонаў на чыгунцы, атрымлівалі магнітныя міны і ўстанаўлівалі іх на цягнікі. Спалілі гарадскую ўправу, сенную і зернавую базы, дом здрадніка Германа. Шмат урону наносілі падпольшчыкі ворагам. І тыя жорстка помсцілі.
4 снежня 1943 ворагі наляцелі ў хату Горава з вобыскам. Відаць нешта пранюхалі, а хутчэй за ўсе атрымалі данос. Гораў трымаў дома ўсе, што перадавалі яму з атрада. У хаце нічога не знайшлі, а калі выйшлі на двор, то здраднік убачыў, што да стога ў двары пратаптана сцяжынка, а сена не кранутае. Пачалі разварочваць стог, і на снег паляцелі магнітныя міны, шашкі толу, лістоўкі…
Горава прама тут, на двары, пачалі по-зверску збіваць, потым пацягнулі ў жандармерыю. Магіла яго невядома.
